Category Archives: Sermon / Article

A CHHE LAI SIAMTHAT DAN TUR

A CHHE LAI SIAMTHAT DAN TUR
(Jeremia 3: 14, 15; 17:5-8; Luka 4:1-12)

- Rev. K. Lalrinmawia
(CKTP Leader’s Valedictory Sermon delivered on 2nd March, 2008)

Thuhmahruai: CKTP Leader chanvo ropui tak min petu Pathian leh a Kohhrante chungah ka lawm em em a. He mawhphurhna tha taka ka hlen theih an duh avanga Thawhtan leh Zirtawpa ka routine min tihzangkhai saktu ka thawhna Aizawl Theological College thuneitute leh ka thawhpui lecturer te chungah ka lawm em em bawk a. Chutia Week-end lama min zangkhai chhuah avang chuan Leader ka nih chhungin Branch leh bial 34 lai ka lo tlawh hman reng mai a. MPF campaign, Mobile Theological School Programme, Senior Department Inkhawmpui, Bial Kohhran Hmeichhe Seminar leh Bial Hmeichhe Inkhawmpui leh Synod Social Front campaign te nena chhiar phei chuan Kohhran 44 lai ka lo tlawh hman reng mai a. Hetianga kawng dang, programme danga ka chhuah pawh hian Bial KTP hruaitu leh Branch hruaitute, Bial zaipawlte nen min lo tawiawm nghal mai thin bawk a. Branch leh Bial hruaitu zawng zawng leh Bial Zaipawl, min lo tawiawm thintute chungah pawh ka lawm hle a ni.

Chutia hmun hrang hrang kan tlawhna atanga ka thil hmuh leh, Chanchinbu lam atang pawha kan hriat chamchi chu Mizo thalaite hi kan ram inrelbawl dan thlirin kan lung a awi tawk lo tih hi a ni. Tunhnai kum 2 emaw lek chhung pawh hian Mizoram mipui dinhmun khaikhawmna awlsam tak chu lungawi lohna kawngah chiah kan lungrual tih hi a ni. Lungawi lo leh lungawi lo kan insûl zut zut a. Sawrkar hnathawk thla kip hlawh la zinga Group A,B,C,D an lungawi lo kim vek a. Engineer rual leh Doctor rual lah chuti bawk. Hna thianghlim tia kan sawi thin zirtirtu lam pawh lungawi kim bik hek suh. Lungawi lohna hi kan inlungrualna awmchhun a ni ta mai emaw tih a awl ta hle. He tawngkam hi hmun hran hranah ka sawi tawh thin a. Thian thenkhat phei chuan an sawi chhawng ve nual tawh nghe nghe.

Thla kip hlawh nei ve lo kut hnathawktu, kum tawpa an thawhrim rah tel ve hrâm chauh thin te hial pawhin nikum (2007) kha chuan mautam sazu puang avangin hlawh lâk tur haihchhamin an kut chi lo hawi vauh vauh tawh a. An ni pawh lungawi lova intelkhawmin ZKP an din a, Aizawlah hial pawh kawng an rawn zawh tawh a nih kha. Hei hi kan ram huntawng chu a ni. Former Legislators Association of Mizoram (FLAM) meuh pawhin kan dinhmun hi lungawi thlak an ti lo aniang, nikum mai khan lehkhabu hming dangdai tak Thih Huamin Aw tih bu an chhuah hial a. PRISM leh MICLUN an lo piang a, Mizoram Democratic Movement (MDM) lo dingin Youth for Mizoram (Y4M) Lungleiah a ding bawk. Chutah hmanni lawk khan Aizawl Venghlui Hall-a thalai rual inhmukhawm chuan Youth for Mizoram Movement (YMM) an din ta bawk. Sawrkarin hna rimtawng thawk tawh lo tura a dahthat pension rual, rual û te pawhin kuangkuaha awm mai mai theih niin an hre tawh lova, MUP hmangin corruption do an rel ut tawh bawk. Hei hi kan ram huntawng chu a ni. Hetih hun ngeia kan Conference thupui atan A Chhe Lai Siamthatu kan han thlang hi a inrem hle rêng a ni.

Engvangin nge chutia lungawi lohna kawnga kan inlungrual tâk em em? Siamthat ngai a awm vang a ni. Thalai rual zingah pawh nikum mai khan inhmuhkhawmna huaihawt a awm nual asin, Aizawl-ah, Lungleiah, Biate-ah leh Serchhip-ah te an inhmuhkhawm hlawm kha in la hre rengin ka ring. Kan zinga thenkhat phei hi chu a meizang hlaptu tak pawh kan ni ta ve ang! Khang kan inhmuhkhawmna te kha kan ram kalhmanga lungawi lohna inhrilh tawnna a ni ber. Siamthat ngai chu a awm chiang a ni. Kan speaker pawhin siamthat ngai laite min hrilh kha:

1)  Kan sakhaw nun tlachhia hi siamthat a ngai

2)  Kan sex life, mipat hmeichhiatna kawnga kan nun siamthat a ngai

3)  Corruption avangin kan ram chu siamthat a ngai

4)  Kan ecology siamthat a ngai bawk

5)  Kan moral hrim hrim hi siamthat a ngai

6)  Kan Politics dik lo lutuk hi siamthat a ngai tih te min hrilh a nih kha

Vawiin chawhma khan chung siamthat ngai laite siamthatu tur chu nang leh kei kan ni tih min hrilh bawk a nih kha. Chumi zui chuan zanin hian thupui atan A Chhelai Siamthat Dan Tur tih ka han thlang ve a ni. Pathian thu i lo ngaithla ang u:

Jeremia 17:5-8:        15 LALPA chuan heti hian a ti:    Mihring rinchhana, mihring bân chakna ringa,

LALPA hawisanna thinlung neitu chu

Anchhe dawngin awm rawh se.

16 Thlalera hnimbuk to rire ang an ni a,              Thil tha chhuak tur reng a hmu lovin

Thlaler ram ro, chi leilung, tuma luah lohvah chuan a cheng zawk ang.

17 LALPA ringtu, a rinchhan LALPA ni erawh chu a eng a thawl e.

18 Tui kianga thingphun, lui kama zungkai, Khaw lum lo thleng pawh hlau lo,

A hnahte hring reng si,

Khawkhen kum pawisa lo,

Rah chhuah thulh chuang si lo ang hi a ni ang.

Jeremia 3: 14, 15      14Aw hnung tawlh hmang fate u, lo kir rawh u,

Tih hi LALPA thu chhuak a ni.

Kîlkawitu che u ka ni si a,

In zing ata khawpuia mi pakhat,

Chhungkuaa mi pahnih ka la ang che u a,

Zionah ka hruai ang che u.

15Ka lungdumzâwng tak berampute ka pe ang che u a, annin hriatna leh hriat thiamnatein an chawm ang che u.

Luka 4:1-12    Tin, Isua chu Thlarau Thianghlimin a khat a, Jordan lui atangin a kir leh a, diabola thlem chungin thlalerah ni sawmli Thlarau hruaiin a awm a.

Tin, chung ni chuan engmah a ei lo;  tin, a tawpah chuan a ril a lo tam ta a. Tin, diabola chuan a hnenah, “Pathian Fapa i nih chuan he lung hi chhanga chang turin thu pe rawh,” a ti a. Tin, Isuan a hnenah, “Mihring hi chhang chauhvin an nung lovang,’ tih ziak a ni,” a ti a, a chhang a.

Tin, a hruai chho va, mit khap kâr lovah khawvel ram zawng zawng a entir a. Tin, diabola chuan a hnenah, “Heng zawng zawng chunga thuneihna leh a ropuina hi ka pe ang che; ka hnena pêk a ni tawh si a, ka duh apiang hnenah ka pe bawk thin a ni. Chutichuan chibai mi buk la, a zain i ta a ni vek ang,” a ti a. Tin, Isuan a hnenah, “Lalpa i Pathian chibai buk la, ama rawng chauh bawl rawh,’ tih ziak a ni,” a ti a, a chhang a.

Tin, diabola chuan Jerusalem khuaah a hruai a, Pathian biak in chip zumah chuan a dah a, tin, a hnenah, “Pathian Fapa i nih chuan heta tang hian tla thla rawh;

Nangmah humhim tur chein

I chung thu-ah zawng

A vantirhkohte chu thu a pe ang,’  tih leh,

An kutin an dawm ang chia

Chutilochuan i kein lung i chhuih hlauh dah ang e,’

tih ziak a ni si a,” a ti a. Tin, Isuan a hnenah, “ ‘Lalpa i Pathian fiah suh,’ tih a ni e,” tiin a chhang a.

Pathian hnenah malsawmna dilin i tawngtai ang u:

Lalpa, zanin zan rei tawh lam thlenga taima taka i aw ngaithla tura thalai rual heti zat nangin min la hruaikhawm avangin lawmthu kan hrilh a che. Zaninah hian Lalpa, i aw hriat kan mamawh. Kan hnenah thu i sawi tawh thin; Zaninah pawh hian a thlâwnin min thêntir lo la. Fak hla hmanga kan hnena i inpuanna hi kan duh tâwk mai lo. Zaninah hian Thlarau Thianghlima kan hnena thusawi turin Nangmah ngei kan mamawh che a ni. Central KTP Leader thusawi thiam tak neihte pawh kan châk thin. Amaherawh chu Lalpa, zaninah hian chu chu a tâwk loving; khawngaih takin he rama a chhe lai siamthat tur min kawhhmuh te, siamthatu tur chu keini kan ni tih min hriattir tawh tea kan thawh dan tur min hriattir leh zel tura Nangmah ngeiin Thlarauva thu i sawi loh chuan kan pawm thiam lovang a, kan pawm thei lovang a, a thawh dan tur hmang kan hre hek lovang. Chuvangin Lalpa, zaninah hian Nangmah ngeiin he rama a chhe lai siamtha tura siamthat dan tur min hrilh turin, kan hnena Thlarauva thusawi turin kan Lalpa Isua hmingin kan dil a che, Amen.

Awle, zan a rei ta viau mai a, kan huphurh tawh hle-in ka ring a. Chuvangin hun lâk rei hleih theih a ni tawh lovang a. Kei pawh dar 6 hma hret khan ka thu tawh a. Dar 7-ah inkhawm kan tan a, kan tan khan darkar khat ka thu hman tawh a. Hei, tunah chuan dar 9 rik nan mins. 15 chauh a awm tawh a. Taima taka ngaihthlak a har tawh viauin ka ring a. Engpawhnisela, a rei lo deuh zawnga sawi dan kan zawn mai loh chuan kan rilru-ah a lut nghet thei tawh lovang tihte pawh a rinawm rum rum tawh a. Thahnemngai taka kan ngaihthlak erawh chuan kan la chân tam lutuk lo turah ngai ila.

Hei, a chhe lai siamthat dan tur chu engtin nge ni ang? Chhânna pakhat kan neih chu Luka 4:1-12 kan chhiar atang khan heti zawng hian kan hlâwm khawm ang:

1. Isua chan ang harhna changin: Mizo Kristiante hian kum 1906-ah Thlarau Thianghlim hruaina leh tihharhna kan chang a, nikum hmasa (2006) khan Harhna Centenary kan lawm a. Thlarau Thianghlim hruaina kan chan kha zozai avang khan vawiin thlengin Kohhran chak tak, nung tak Pathianin min pe a, a va lawmawm em! Mahse, khang harhna kan chan tawh zawng zawng kha han thlirlêt ula; vawiina kan khawtlang nun, kan politics nun leh kan economics nun min hruai thlengtu chu khâng kum kalta te kha an ni tho si. Engtin nge kan tih tâk ang tih hi zawhna, chhan ngei ngai chu a ni ta. Mizorama a chhe lai siamthatu tur chu thalaite hi kan ni a. Chumi siamtha tur chuan a siamthat dan tur kawng kan hriat a ngai. A siamthat dan tur kawng pakhatna chu Isua chan ang harhna chan hi ani tih hi kan chhânna neih chu a ni.

Isua chan ang harhna chu engnge ni? Engtin nge kan hriat ang? Isuan harhna a chang reng reng em ni? Isua khan harhna a changin kan hria em? Isua kha, kan rilruin han suangtuah chin ila; helai conference lamtualah hian rawn su ve lauh lauh a, a changa han bingbilet a, han kûn a, han bungbu a, psiatica vei ang maia han su deuh zak zak turin kan beisei em? Kan beisei thei lovang ti rawh u? Mahse, chutianga ti tura Isua kan beisei loh avangin khatia han bu deuh lauh lauh thinte kha harhna chang an ni lo kan tihna chu a ni hauh lo ania!

Ama’rawh chu, harhna kan tih hi ti hian tawitêin han sawifiah dawn ila: Harhna tia Kristian Kohhranin kan sawia kan kawhtir ni fo chu Thlarau Thianghlim hnathawh, Thlarau Thianghlim hruaia awm, Thlarau Thianghlima khah hi a ni. Luka 4:1 a kan hmuh chiang tak chu Isua chu Thlarau Thianghlimin a khat tih a ni a. “Jordan lui atangin a kir leh a, diabola thlem chungin, diabola thlem chungin thlalerah Thlarau hruaiin a awm,” a ti leh chat a. Isua hian baptisma a chan zawh veleh, Marka ziak leh Mathaia ziakte pawh en ula; Lal Isua nuna a hun hman dan indawt kan hmuh chu Baptisma a chan zawh veleh thlalerah Thlarau hruai luhin a awm a. Chutah chuan ni 40 chhung tehrêng engmah ei lovin a awm a. Riltam taka thlalera a awm lai ngei chuan thlemtuin a rawn bei zui chat.. Chu chu Thlarau hruaia Lal Isua awm dan a ni. Thlarau Thianghlima khat leh Thlarau hruaia awm ngeite hian a ni thlemna tawk thin ni!

Mizo Kristiante pawh hi kum 100 zet Thlarau Thianghlima khatin kan awm a, Thlarau Thianghlim hruaina kan dawng a. Kan hlimin kan lawm, kan lam, kan phûr, kan tawngtai, inkhawm pawh nuam kan ti. Mahse, kan khawtlang nun, kan politics nun, kan economics nun chu siamthat ngaiin a awm ta si a nih hi. Chuvang chuan alawm Isua chan angin harhna hi i chang ve tawh ang u tih hi kan sawi a lo tul tâk ni! Isua chuan eng angin nge a chan?

1) Economics Thlemna: Thlalerah ni 40 Thlarau Thianghlima khata a awm lain engmah rêng ei lovin a awm a. Chutah chuan a ril a lo tam ta a, chu chu Thlarau hruaia a awm lai ngeiin a ni. Kha kha ‘diabola thlema awm turin’ tiin Luka chuan min hrilh a nih hi! Chuta thlemnate chu i’n en lawk teh ang. “Tin, chung ni chuan engmah a ei lo; tin, a tawpah chuan a ril a lo tam ta a. Tin, diabola chuan a hnenah, “Pathian Fapa i nih chuan he lung hi chhanga chang turin thu pe rawh.” Ni 40 teh meuh engmah ei lova awm riltam theih dan tur chu han suangtuah teh u. Hmanni-a Agape Center-a ni 40 chaw ngheia tawngtai zingah khan ni 40 tluan parh engmah ei lo engzat tak awm maw? Thenkhat chu a changa kala lo haw leh rih thin te kan nih nual kha! Chaw ngheia thla khat leh a chanve dawn engmah reng ei lova awm Isua kha a va chau dawn êm! Isua kha mihring a ni a, hetih lai hian kum 30 mi vel angin suangtuah ila, rawngbawl hna a tan dawn lai a mi a ni a.

Chutiang rual nih lai taka, chaw ei tui duh hun lai tak, kan Assistant Leader te bar tiat bar thei tur chu a ni ve ngei ang. A, in thlen ina in chaw ei tui dante kha inngaihtuah ula. Zanina muthlu te kha in vawksa hmeh vang a ni nghe nghe em aw…! Vawksa ei hnem deuh chu an muthlu lap lap duh viau mai a. Mahse, rin aiin in la harh tha hlawm viau zawk a. Isua pawh hia kan hruaitute, kan Treasurer te bar tiat tiata bar tur angin han suangtuah tai la. Mihring a nihna hi kan rilru-ah a chiang har khawp mai, Isua hi. Pathian a nihna leh Pathian Fapa a nihna hi kan chiang em em a. Mihring riltam thei, chaw ngheia chau thei a nihna hi… thalai zinga sawi kan ni bawk a, thalai tawng kan hmang zeuh zeuh ang. Mihring dinhmun pangngai, thalai dinhmun ang a a awm dan tur leh a chauh ve theih dan tur te hi kan rilru-ah a click mang lo fo, kan suangtuahnain a thleng mang lo fo. Mihring famkim a nihzia kan hriat chuan chau thei, chaw ngheia riltam thei, tamchhawl thei a ni tih kan hria ang. Chutih hun lai tak, Thlarau hruaia a awm lai taka thlemna a tawn kan hmuh pakhat chu hei hi a ni. A riltam dawn nk a lain, a riltam vanglai taka chhanchhuahna a mamawh dan ber, a chhandamna hnai ber tur chu puar taka chaw ei a ni. Chutih lai tak chuan “Pathian Fapa i nih chuan he lung hi chhanga chang turin thu pe rawh,” tih thlemna a tawng ta a ni.

Palestina rama Juda ho, Isua hun leh vawiin thleng pawha an chaw rinpui ber chu keini ho chuan chhang kan ti. Barli chhangphuta siam, hmeh kawia ur hmin kha a ni a. Chu chu keinin atta kan ti a nih loh pawhin chhang kan tih chi chu a ni tho tho. Keini Mizo thalai rualin he thlemna hi tawk ve ni ta ila, ‘he lung hi chaw-ah chanter rawh’ tiin min thlem ngei ang. He thlemna hi eng thlemna nge nia in lo suangtuah thin? Mihring riltam tihtlaina, pum puarna, ei leh bar thil a nih avangin Economics thlemna a ni. Isua harhna chang ve chuan thlalerah khawhar taka riltam em ema awmin economics thlemna a tawk a nih chu!

Keini Mizo Kristian, harhna chang ve thin te pawh hian he Economics thlemna hi kan tawk ve thin a. Camping-ah kan lut a, hlim em ema chhuakin kan phur em em a. Phur em em chungin kan ni tin hnathawhna mual theuhvah kan han feh chhuak leh a. Thla hnih khat chhung emaw chu nghet takin, Economics thlemna lakah pawh tihtluk rual loh angin kan la ding thei pawh a ni mai thei. Ama’rawh chu harhna chang Mizo Kristianten economics thlemna kan tawh nasat dan hi han ngaihtuah teh u; a sorkar rilru angin ka sawi lo. Entir nan mai mai; tun hnaia Chanchinbu-a kan hmuh langsar tak pakhat chu Civil Hospital-a Out Patient Department (OPD) Building sak mekah chhawng khat a bo em ni? tih te a ni a. Mizo Kristiante hi Economics thlemna do zo lo, lung chhanga chantir mai hnial lo harhna chang kan nih tlat thin avang hian alawm a chhelai, siamthat ngai a awm thin ni! Chuvangin, heng siamthat ngai lai siamtha tur hian economics thlemna i do zo ve ang u. Economics thlemna do zo harhna i chang ang u.

2) Thlarau mi-na hmanga thlemna: Harna chang Isua thlemna tawh dang hi han en leh ila. Luka ziak indawt dan zui lovin a laia mi hi a tawp berah kan dah ang a. Chang 9 atang khan han chhiar chhunzawm leh ila: “Tin diabola chuan Jerusalem khuaah a hruai a, Pathian biak in chhip zumah chuan a dah a, tin, a hnenah, ‘Pathian Fapa i nih chuan heta tang hian tla thla rawh; Nangmah humhim tur chein i chungthu-ah zawng a vantirhkohte chu thu a pe ang’ tih leh ‘An kutin an dawm ang chia, chutilochuan i kein lung i chhuih hlauh dah ang e,’ tih ziak a ni si a,” a ti a. Heta kan hmuh chu Pathian biak in chhip zum atanga tla thla a, na miah lova leia zuk tum tura thlemna a ni. ‘Pathian Fapa i ni takzet a nih chuan chu chu a thleng dik ngei dawn alawm’ tih kha he thlemna hian a keng a ni.

Khaw’nge, han ngaihtuah teh u; Bilkhawthlir North Biak in chhip zum atang khian kei hi tla thla ta diai diai mai ila; na miah lovin a kawt zawlah khian han tum khu leih mai ila, in rawn tlan chho, in rawn pung chak ngawt ang. He lai KTP General Conference inkhawmna Pandal tlan rauhsan hian engemaw zat chu in rawn tlan chho duh ngei ang. Eng vang nge? A mak kan zawng a, kan Thlarau mi-na hian a danglam a duh a; a danglam leh pangngai lo hi kan zawng nasa thin lutuk a. Mi thlen bak thleng nih duh hian kan phili a. Chutianga harhna chu kan zawng tlat thin. Isua hian chu thlemna chu engtin nge a chhan? “Lalpa i Pathian fiah suh,” tiin a chhang thla hmak phal a sin. Pathianin chutiang khatiang chuan a rawn ti mai ang, i na miah lovang tia thlemna hi hnial a har a ni ang e. Heti hian han ti ila miin hre thuk, mi dang aia chang sang, mi aia chang ril, midang thlarau chan pawh sawifiah sak thei nih thlenga Thlarau Thianghlim chang, harhna chang nih chak zawng hian kan in-el nasa lutuk palh a ni mai em? Chak mak bik nihte kan chak lutuk a ni palh mai em tih hi kan ngaihtuah tel ve a tha. Engpawhnise, he thlemna hi Thlarau mina hmanga thlemna, sakhuana hmanga thlemna, inpekna thuk hmanga thlemna te pawh kan ti thei ang. Thlarau mina hmanga thlemna hi Thlarau Thianghlim hruaia awm, Thlarau tihharha awm, harhna changte ngeiin an tawk thin.

Harhna chang Mizo Kristian zingah chutiang thlemna tawka tlu tawh sawi tur kan ngah mai. Kum 1913 ah harhna chang Tlira pawl an lo chhuak daih tawh. Tichuan kum 1919, a, kum 1930 leh a hnu chhovah phei chuan khatiang pawl chhuak kha an tam em em, an awm zut reng a, hnaivai te thlengin sawi tur an awm thei ang. Pawl chhuak emaw, Kohhran atanga chhuak em lo pawhin mimal nuna Thlarau Thianghlima harhna chang inti, Thlarau hriattirna dawng inti, mi dang aia chang sang bik, mi dangb aia hre ril bik, mi aia hmu fiah, mi aia tha zawk, midang aia nunpui dik zawk anga inchhal zawng hian Thlarau Thianghlim hruaia awmte hian thlemna kan tawk thin a, kan tlu bawk thin. Chutih karah chuan tlu lova khawchhuak pawh an awm thei bawk ang. Isua erawh kha chu a tlu ve lo; “Lalpa i Pathian fiah suh.” A chang mak zawng, a danglam zawng, mi dang aia ril zawngin chan a tum lova. Amah kha a ropui a, biak in chhipzum atanga tla thla a, khu laiha lo tum a na miah lo zawng, mi dangin thilmak ti thei tia an bawh hum hum tur zawng, an zui hum human tur zawng, ama larna, ama ropuina, zuitu a neih theihna tur zawngin harhna a chang duh lo.

Chutiang bawk chuan keini pawhin Isua chan angin kan Thlarau mi-na kawngah pawh nun nghet nei zawngin, ze nghet, ze mumal nei zawngin harhna i chang ve ang u. Tichuan a chhe lai kan siamtha thei dawn nia. Nizana kan ngaihthlak kha in la hre reng em? Kan sakhaw nun a tla chhia tih kan ngaithla a nih kha. BSNL a Mizoram thla khat bill pek luh pawh nuai 190 chuang, nuai 200 dawn lai a ni a. Chutih lain chhungkaw tam tak chuan missionary pakhat chawm pawh harsa kan ti thung si; mangan thlak ve deuh chu a ni! (Nimin chawhnu khan rorelna lamah kan kal a, helaia mission pual programme kha kan tawng ve ta lova, kan chan nasa hle mai.) Chutiang chu kan ram dinhmun a nih laiin sakhuana hmanga thlemna do zo turin thalai rualten – a chhe lai siamtha tur chuan Economics thlemna kan do zawh a ngai a, a chhe lai siamtha tur chuan sakhuana hmanga thlemna, mi aia hre ril zawk, mi aia nunpui dik zawk zawnga thlemna pawh kan do hneh a ngai a ni.

3) Politics Thlemna: Isua thlemna tawh dang hi i han en leh teh ang. “Tin, a hruai chho va, mit khap kar lovah khawvel ram zawng zawng a entir a. Tin, diabola chuan a hnenah, “Heng zawng zawng chunga thuneihna leh a ropuina hi ka pe ang che; ka hnena pek a ni tawh si a, ka duh apiang hnenah ka pe bawk thin a ni. Chutichuan chibai mi buk la, a zain i ta a ni vek ang.” A pawn lama mi khan kan hre pha em aw! Duhsak falna hi Mizo Kristian harhna chang zingah hian a va tam tawh em ti rawh u. Thenawmte hriat phak ve lohva induhsak falna a tam lutuk, a ri lo, a zawi sap chin kha a ngaih pawimawhawm bik riau hian a lang tlat. I han chhiar tha leh teh ang: Heng zawng zawng chunga thuneihna leh a ropuina hi ka pe ang che; ka hnena pek a ni tawh si a, ka duh apiang hnenah ka pe bawk thin a ni. Chutichuan chibai mi buk la, a zain I ta a ni vek ang.”  Kan hrethiam ti r’u? Kan nuih hak danah khan kan hrethiam niin ka ring.

He thlemna hi eng thlemna nhi eng thlemna nge ni ta ang? In rilru-ah chiang a awm tawh mai em? Khawvel ram zawng zawng leh a ropuina chunga thuneihna chu eng thlemna nge? Political power! Political power nei tura thlemna hmaah hian Mizo Kristian, harhna changte hi kan lo tlu leh palh thin a; chuvang chuan a chhe lai, siamthat ngai a lo pung ta a nih hi! Chumi siamthatu tur chu NANG leh KEI hi kan ni bawk si. Engtin nge kan tih tak ang?

He khawvel ram leh a ropuina chunga thuneihna, political power nei tur hian mitten an bei thin a, an zawng thin a. Thlemtu hian a sawi dik fe awm asin mawle! Dawt sawi langsar tak erawh chu a nei; ‘ka hnena pek a ni tawh,’ tih hi dawt a phuah chawp a ni, dawt pa a nih tlat avang khan. Mahse, a sawi zinga ‘dik fe awm e’ ka han tih kha chu “chutichuan chibai mi buk la, a zain i ta a ni vek ang,” tih lai kha a ni. Isua Krista ni lo zawk chibai buk hian Political power neih a awl bik. Lalna chang tura, khawvel ram leh a ropuina zawng zawng chunga thuneihna nei tur hian thlemtu zawk bawkkhupa chibai buk hian hlawhtlin a awl deuh a ni ang a!

Kum 2003 ah, 1998 ah te, 1993, 1989, 1983, 1979, 1977 leh 1972 thleng khan… Kum 1972 kha Mizoram-in Union Territory dinhmun kan chuankai kum a ni a. Kan puala Legislative Assembly kan neih tan kum a ni. A hma kha chuan kum 1952 atangin District Council kan nei a, MDC leh Executive Member rualten ram an enkawl a. Khatih chhung zawng khan Mizo Union kan thlang tling chho char char a. Kum 1972-a U.T. MLA hmasa ber kan thlan tum pawh khan Mizo Union bawk kan thlang tling a. Mahse, a kum leh lawkah Party lang tham vak lova ngaih Indian National Congress (INC) in a dawlh ta daih mai a. Tichuan kan thlan tlin mi pangngai reng ate chuan Congress ministry an han siam leh a. Kum 1977-ah PC kan thlang tling a, PC an keh avangin 1979-ah kan inthlang tha leh a; PC bawk kan thlang tling leh a. Kum 1984 khan Congress kan thlang tling ta thung a. Kum 1987-ah State a kan awm tak avangin State MLA hmasa ber kan thlang a, hneh takin MNF kan thlang tling a. Mahse, an party chhung inrem lohna avangin inthlan that a lo tul leh a, kum 1989-ah kan inthlang tha a. Tah chuan Congress kan thlang tling leh ta thung a. Kum 1993 November thla kan inthlan leh npawh chuan Congress bawk kan thlang tling a. Kum 1998-a inthlan a lo hun leh chuan MNF kan thlang tling leh a, kum 2003-ah pawh MNF bawk kan thlang tling leh ta a nih kha.

Kum 1952-a District Council-a kan awm atang khan kan aiawh thlangin mipui kutah rorelna a awm tawh a. Mahse, U.T kan nih hma zawng kha chuan kan Budget a la pate viau a ni. Kum 1972-a U.T kan han nih atang chiah khan kan Budget chu a rawn lian ta hluai, a rawn thau ta hnuk mai a. Chutah chiah chuan Economics thlemna do zo lo an rawn pung ve ta hluai bawk a. Economics thlemna do zo lo an pun hluai rual khan Politics thlemna do zo lo kan ngah ve sawt bawk a. Political power neih kha sum leh paia hlawkna niin miin an hre tlat tawh a. Chumi kum 1972 atanga vawiin thleng hian he kawngah hian, politics thlemna kawngah hian ding nghet zo lo hruaitu kan nei ta fo mai a; chu chuan lungawi lohna khawvelah Mizoram hi min hnuk lut a ni ber mai. A chhe lai siamthat ngai kan tih, kan moral a chhia kan tih pawh Politics kan hmuh dan te, Politics kan thlir dan dik lote hian a hring tel ve. A chhan chu – political power neih chu thawkrim lova sum leh pai, in leh lo tha neih theihna niin kan thinlungah a intuh deuh tlat. Chumi thiat tur chuan nang leh kei hian mawh kan phur. Tuna naupang, vawiina KTP member la rawn ni ve pha loten Politics hi Pathian rawngbawl nan an rawn hman theihna turin kumina Kristian Thalai Pawl heti zat rual hian example kan ‘set’ dawn lo’m ni? Chu chu a chhe lai kan siamthatna tur, kan tih theih dan tur chu a ni. Isua chan ang hian harhna hi chang theuh ila a chhe lai kan siamtha ngei ang.

Kuminah thil a nihphung pangngaia a kal chuan MLA thlang leh tur kan ni a. Chu inthlan hmachhawn tur chuan he rama lungawi lohna phul bulh bulh, kil hrang hrang atanga report kan hriat zut zutah hian, an inpuh tawnnaah hian khawi dika khawi nge dik lo tih keini tan hriat hleih theih a ni ta lo fo mai. A chhan chu kan politics-ah hian dawt-in lalna a chang niin a lang tlat. Chumi tireh tur chuan, chutiang dinhmun chhelai kan siamthat nan chuan kan ram politics-ah hian party politics hi nuai reh ila. Kan ram politics ah, Pathian lalna atan kan ram politics-ah hian, kan ram rorelna khawlah te, kan khawtlang rorelna ah te, kan District rorelna ah te, kan Block Area rorelnaah te Krista chu Lalberah i siam ang u.

A chhe lai siamthatu ni turin tukinah te, vawiin chawhnu-ah te “Lalpa min tawngtai tir rawh,” Rev. H. Killuaia hla phuah kan sa a, kan tuipui em em a, kan vei em em a ni. Hmanni lawkah pawh Aizawlah thalai pawl a rawn ding a, nikum lamah Lungleiah a ding a. A din hma lawk khan a dinna tura a hnarkaitu zinga pawimawh tak pakhat chuan a khat tawkin min rawn sms deuh reng a. “Chutiang khatiang chu kan tih dan a ni,” a rawn ti thin a. Kam Zalenna Dawhsan (Freedom of Speech Platform) te an siam a. Biate lamah thil a awm bawk a, Serchhip ahte leh hmanni lawkah Aizawl Venghlui Hall-ah te pawh an inhmukhawm a. A hnu lawkah pawl an rawn din ta a nih kha. Khang zawng zawngte kha thlirlet ila kan ramah hian siamthat ngai chu a awm a ni. Ama’rawh chu, chu siamthat ngaiah chuan tuten nge mawhphur? A veitute chauhvin mawh phur niah kan ngai a nih chuan; mi dangte hian vei lova kan chhuak a nih chuan kan siamtha zo leh chuang lovang. Ama’rawh chu kan vei a nih pawhin kan vei dan a dik a ngai tlat a. Chu vei dan dik nei tur chuan Pathian thu hi kaihruaitu atan kan hman a ngai ang. Theological ground, Bible behchhan, nghah chhana hmang lova kan ram veitu thalai rual an pung hluai a nih chuan kan ram hian a chhiatphah nasa zawk ang tih a hlauhawm. Chuvangin Kristian Thalai Pawlte hian mawh kan phur a ni. Chu mawhohurhna hlen tur chuan tihtur kan nei. Chu kan tih tur chu eng nge ni ta ang?

Engtin nge niang? tih zawhna chhang turin, a, kan rama a chhe lai siamthat dan tura kan chhanna pakhatna chu Isua chan angin harhna chang ila; economics thlemna do zo, sakhuana thlemna pawh do zo, politics thlemna pawh do hneh thei harhna i chang ve ang u tih hi a ni e.

2. Party Politics Bansana Ram Politics Vei Tur: Kan chhanna pahnihna-ah lo lut nghal dawn ila. Mi thenkhatin politics hi ringtu thate tel vena tur niin an hre lo thin. Mahse, Politics tih tawngkam hi Grik mifing Aristotle-a kamchhuak pawh ni sek sek rawh se, Politics lo chhuahna bul ber chu kan Pathian a ni. Pathian chu engkim chunga Lalber leh thuneitu a nih avangin amah ringtute hi ram politics-ah kan ralbang mai tur a ni awzawng lo. Party Politics-ah zawng inham berh ve lo tur pawh kan ni ang e; Ram Politics erawh hi chu kan Pathian ta a nih avangin kan hlamchhiah tur a ni hauh lovang. Kan ram politics ah Krista a lal zel theihna turin Kristian Thalai Pawlten, rawngbawltute hian kan sawi nasa tur a ni.

Chuti ni lova, ram politics pawh ni lova Party politics-a mi an chhaih buai thin avangin kan ramin chhiat a tawk a ni; kan ramin rawk a tawk a ni. Lalber atan Pathian neih phal lova mahni hlawkna tur dah lal zawk thin te, mahni chhungkhat vua leh vang hlawkna tur dah lal thin zawk ten kan ram politics hi an suasam fo a nih chuan siamthat theih lohvin a chhuak mai pal hang. Chuvangin zaninah hian ‘Party, Party’ ti lovin kan ram lalthutthlengah Pathianin lalber nihna a chan theihna turin zanina lo pungkhawm Kristian Thalai rualte, harsatna engemaw avanga rawn kal ve thei lo, mahni in lama awm Branch leh biala thalai engemaw zat la awm, nuai khat chuangte hian mawh kan phur. Engtin nge kan hlen ang?

Jeremia chuan, “LALPA chuan heti hian a ti:

Mihring rinchhana, mihring bân chakna ringa,

LALPA hawisanna thinlung neitu chu

Anchhe dawngin awm rawh se.

Thlalera hnimbuk to rire ang an ni a,

Thil tha chhuak tur reng a hmu lovin

Thlaler ram ro, chi leilung, tuma luah lohvah chuan a cheng zawk ang.

LALPA ringtu, a rinchhan LALPA ni erawh chu a eng a thawl e.

Tui kianga thingphun, lui kama zungkai,

Khaw lum lo thleng pawh hlau lo,

A hnahte hring reng si,

Khawkhen kum pawisa lo,

Rah chhuah thulh chuang si lo ang hi a ni ang,” a ti.

Keini chuan ram siamna atan Party chakna, Party ban chakna kan rinchhana Lalpa kan hawisan tawh a ni lo’m ni? History zir ve thin ka ni a. Kum 1972 atanga vawiin thlenga kan rama inthlan history hi kan hre kimchang thei hauh kher lovang a. Ama’rawhchu, ka chhui let ka chhui let a, ka zir let ka zir let hian kum 1972, 1977, 1979, 1983, 1987, 1989, 1993, 1998 leh 2003 te a kan inthlan zawng zawngah khan Party tinin Pathian chakna aiin Party chakna an behchhan lian zawk theuh. Party tana mi nghet nia an hriat, Party worker rinawm nia an hriat, Party hruaitu nghet nia an hriat kha candidate atan an dah chhuak zar zar thin a ni.

Zanin hian Party rinchhan bansan ngam, Party chakna rinchhan lo ngam ten kan ram an hruai hunah kan ram chuan hma lam a pan ang a; kan ramah Krista’n lalna a lo chang ang. Chumi thlentir tur chuan Nang leh Kei hi kan inpe phal em? Kan rama Party mi an tam dan leh, ‘chumi khua-ah chuan chumi Party chuan member chuti zat an lawm lut’ tih te Chanchinbu-a kan hmuh leh chuah tawh hi! Heng an lawmluh zinga engemaw zat ten Party an belh chhan leh Party a an inziah luh chhan chu “Anni hi kan thlantlin chuan, tling turin an rinawm ber bawk a, an lo tlin chuan hmelhriat tha kan nei ve a lo ni ang a; kan fanu kan fapa ten sorkar hna an hmu ve thei mahna! I R –ah te pawh an lut ve thei mial mahna! Zirtirtu hna te kan hmuh phah thei mahna tih hi a ni fo. Ram siamna hawi hian politics hi kan thlir lo. Chu chu a ni kan speaker-in “kan moral a chhia’ a tih kha. Kan economics dinhmunah pawh sorkar-a innghat lo thei lovin kan awm tawh. Kan moral hi a chhia. Ram siamna atan miin an hman thin (Politics) hi kan ram tihchhiat nan kan hmang mekte hi a va pawi em! Party chakna kan rinchhan vang a ni. Hawh u, Party chakna rinchhan i bansan ang u. Kristian Thalai rual lo pungkhawm zawng zawngte hian Party chakna rinchhan kan bansan ngam phawt chuan Lalpa chakna rinchhanin Party tin pawhin Candidate an siam hunah Party tana rinawm, Party tana thawk rei tawh, Party tana inhmang nasa tih ringawt ngaihtuah lovin, tlin an duh tak tak a nih chuan Pathian tih mi, Party nei ngai reng reng lo, Pathian tih mi ziktluak kha bial tinah an rawn candidate mai ang a. Chutiang mi ziktluak hlir chu Party tinin an rawn candidate phawt chuan kan ram lalthutthlengah Pathianin hmun a chang thuk lehzual ang. Chutiang a thlen theih nan Nang leh Kei hian mawh kan phur, awmzia kan nei si a ni.

Engtin maw awmzia kan neih? K.T.P member zawng zawng, a ‘zawng zawng’ tak tak chu a theih hauh lovang a; thenkhat chu Party thalai pawlah emaw, thalai pawl kher lovah pawh hruaitu nihna chelh mekte pawh kan awm thei. Mahse, kan han sawimawi thin tam tak, a…, ‘kan ram rawngbawl nan alawm kan tih’ tia insawimawi tam tak hi chuan inthlaphen nan kan ti ve mai mai bawk a ni. Mahni hlawkna beiseiin tam takin Party an bel a, tam takin chutiang rilrukna chuan politics an khel a ni tih hi chu i pha duh lovang u. Mahni tanghma haia mahni hlawk nana kan beih avangin kan ram hi kan tichhe mek a ni tih hi i hria ang u, i bansan ngam ang u. Chuti a nih loh chuan Isua chan ang harhna kan la chang lo tihna a ni ang.

Isua chan ang harhna chang turin, kan ram siamthat nan Lalpa i rinchhan ngam ve ang u. Chutiang a nih chuan engtin nge Jeremia hmanga Pathian thutiam kan hmuh? “14Aw hnung tawlh hmang fate u, lo kir rawh u, Tih hi LALPA thu chhuak a ni. Kîlkawitu che u ka ni si a, In zing ata khawpuia mi pakhat, Chhungkuaa mi pahnih ka la ang che u a, Zionah ka hruai ang che u. A zawha a sawi zel hi eng nge ni? Ka lungdum zâwng tak berampute ka pe ang che u a, annin hriatna leh hriat thiamnatein an chawm ang che u.

Pathian hnena kan inlamlet a, mihring ban chakna, Party tha chakna rinchhana ram hruaitu siam aia Pathian chakna rinchhana ram hruaitu siam thlang kan nih chuan a mipuite lungawi lohna khawvela inchentir tawh lovin mite hriatna leh hriat thiamnaa chawm tur Pa lungdum berampu kan hmu thei ang. Chu chu a chhe lai siamtha tura kan tih theih chu a ni. Chutiang tur chuan zan ina thalai rual lo pungkhawmte hi kan inpe phal em?

Zanin kan hun hmanah hian danglam deuhvin hun hman chhunzawm zel pawh kan tum ang. Mahni inphatin Krista lal nan he ram hi kan pe phal em? He ramah hian Krista chu lal turin kan duh tak tak em? Kan duh takzet a nih chuan ro min relsak turin i sawm ang u hmiang! Sawmna kan siam ang. Thalai rual kan mangang a, kan ramin siamthat a mamawh zia kan hriat a, kan au va kan tih chuah chuahnaah hian KTP member engemaw zat kan tel bawk a. Chutianga siamthat kan duh tak tak a nih chuan a chhe lai siamthatna tur kawng chu kan politics-ah hian a bul tan a ngai a ni tiin kan chhang a nih chu!

Sorkar tha neih duhin kan auva, mahse mipui tha nih kan tum chuang si lote pawh hi! Mipuite pawh hian kan sim a ngai ve bawk asin. Sorkar tha siam tur chuan mipui tha kan nih hmasak a ngai ang. Mipui tha kan nih loh avangin pawisa pe tam thei thei an rawn thawk ang a, a pawisa pe tam thei thei kan lo thlang tling ringawt pek ang e. Mipui tha kan nih hmasak a ngai. Chutiang ni ngam tur chuan zaninah hian i nunah Krista, i politics nunah khan Krista i laltir phal em? In khawtlang nunah Krista i laltir phal em? He khawtlangah, he ramah hian rorel turin Pathian kan sawm ngam em? ‘Ro min rel sak ang che,’ kan ti ngam em?

A thu te kan za a tan Lalpa’n mal min sawmsak rawh se, Amen.


  

Khawngaih thil thlawn pek

Khawngaih   thil thlawn pek

- Roma

‘A famkimna kan chang theuh, khawngaih chunga khawngaih leh chhawnna nen. Dan thu Mosian a pe, khawngaihna leh thutak Isua Krista avangin a lo awm” (Johana 1:16,17)

Vawiinah hian an felna leh an that avanga vanram kai tur tunge kan hriat…? A ni chu a fel em mai…A tha em mai…Ka hriat tirh atang khan KTP ah a in hmang tawh… vawiin ni thlengin a la inhmang….emaw miin a hming an sawi pawh a KTP/Kohhran emaw lang nghal tlat mihring pawh ni sela. Chung zawng zawng avang chuan vanram a kal dawn chuang lo.

Chuti ngawt chu a ni dawn em ni? An hmel kan hmuh ringawt pawh a KTP nute-i te, KTP pate-a te, kan active member te, kan hruaitu lawk tak tak te, Kohhran hi an ta hliah hliah asin. KTP-ah hian neitu nihna thinlung an pu asin. Mahse, he Pathian khawngaih thil thawn pek hi an man fuh loh vaih chuan an tan pawh thil pawi tak a ni tho tho.

Mihring hian pianpui zia kan nei a. Chu chu ze tha lam leh ze tha lo lam tiin lo sawi ta ila. Chu ze pahnih chu mihringte hian kan nei vek a ni. Chu a tha lam zia chuan kan hmangaih bik te, kan duhsak zawng te, kan tlawn bik te, mi ropui deuh bikte kan dawr thin a. Chutiangin kan mize tha lo lamin kan hmuhsit zawng te, rawngbawlnaa kan hnuai deuh nia kan ngaih te, mi rethei te, kan thalaipui addict te, drugs ngawl vei te, kan hnuai deuh nia kan hriat te leh kan ngei zawng te dawr nan kan hmang thin thung. Heng zawng zawng hi Pathian atanga chhuak a ni lova, chu hmun atang chuan Pathian a hmuh theih hek loh. Thuthlung hluiin hei hi min zirtir chiang hle mai.

Thu sawm pek dan pek an ni a, chu dan chu mihring tumna in an ze tha lam chhuahin nasa takin zawm tumin tan an la a. Pathian thupek angin serh an tan a, sabbath-ah an chawl a, ei loh tur an ei lova, inthawina an hlan vak vak a, sim turin ni khatah vawi eng emaw zat an tawngtai a, amaherawhchu an sim fai thei chuang si lo. Inthawinan ran an talh a. Bawng, kel leh beram te, thuro leh parva thisenin ngaihdam an ni. Mahse ngaihdama te kha an tha hlen thei chuang lo. Serh an tan a, an that hlen phah lova, vawksa ei lohin an dawt sawi a tibang chuang lova, tawngtaina nasa taka hmang ten tawngtai ve lote hmuhsitna a hring chhuak ta mai si a. An ze tha lam chhuahna chuan Pathian a ti lawm thei ta lo.

I nun kha ngaihtuah chiang rawh le. A tha lam zia atang mai a inkhawm, a tha lam zar atang mai a rawngbawltu i lo ni palh a nge?  Mi tam takin a chhe lam zarin drugs te, sex te, zu te an in thin.  A tha lam zar chauhva lang mawi, rawngbawltu i nih chuan a chhe lam zar a thil sual hrang hrang nia kan hriat ti thin te nen hian mihring mithmuhah in ang lo mah ila Pathian mithmuh ah erawh chuan danglamna kan awm lo.

Kan Pathian thu sawitu tam tak te pawh hian mi hming tha, Pastor nungchang tha lai te, kan Kohhran pa te hnathawh that nasa tak takte ti ve tur leh an hnung zui turin min zirtir thin. Tin, Lal Isua thiltih te sawiin amah ang a ti ve turin kan in zirtir bawk thin. A dikna lai a awm pawh a ni mahna. Mahse uluk zawkin han ngaihtuah ve mah teh. Kan thei reng em? Lal Isua hi a an a an tum chi nge? Kan an theih loh avangin Lal Isua Krista chu kan tan a inhlan? tih hi i ngaihtuah ang u. Kawng thenkhat chu kan zawh ve thei mai thei e. Tih theih loh leh zawh loh hun kan nei ngei ang. Sawisel bo, famkim Pathian an tuma beih chiam hi at thlak tak a ni tih kan hriat a tul hle.

Kohhran te hian camping te kan nei thin. Camper-te pawhin hlim tum ran leh danglam tum ranin kan lut a. Camping kan han tan a, Speaker-ten tihtur min lo chhawp sak hnur mai. Zing tawngtai Inkhawm kal te, Bible chhiar te, Inkhawm zat zat te, lenkhawmna a kal zat zat te, mihring danglam turin min ti a ni. Camp kan han chhuak a, zo leh zo lovin tihtur kan awrh chhuak hnawk a, a tir chuan kan la zawm tha thei hle. Mahse kan mize tha lam khan a lo daih rei awzawng si lo. Engemaw kan han dai pelh zauh va, ‘ka da leh ta’ kan ti leh mai thin zawng a nih hi maw.

Ephesi 6 thu la chhuakin nu leh pa thu zawm turin kan in zirtir a, nu leh pa thu awih chuan Pathian ti lawmah kan in ngai thin. Thil dik tiah kan in ngai tlat tawh hlawm a nih hi. Mihring tumna chuan tamtak chu a theih mai zel a. Thil tha chu a ni. Mahse hmaih kan nei hian ka hre thin. Lalpaah chuan tih hi kan sawi lang tel khat khawp. Lalpa atanga chhuak a nih loh chuan engmah lo mai a lo ni tih i hre thar ang u.

Pathian lam atangin felna te, thatna te, dawhtheihna te, thianghlimna te engkim awm mahse chumi chu kan chan hma chuan he tisa lam atanga chhuak a lem, mize tha lam ti a kan sawi a kha a awm tlat si a. Pathian kan dawr emaw kan in ti a, Pathian rawng kan bawl emaw kan in ti a. Kan zetha lama kan thil tih hrang hrangte chu Pathian malsawm tir te kan tum thin. Chu chu bawlhhlawh a ni tho tho.
Tisa mizia hi kan hriatthiam chinah Pathian min dahna hmun kan lo hrethiam ang a, Lalpa’n a fapa Isua Krista a min hmuhna hi kan tan a tawk a ni tih kan hmufiah tawh ang. Pathian hian a fapa neihchhun Lal Isua Krista kaltlangin min zawngchhuak tawh. Chutah chuan nang leh keia dam thei lo, inringhlel thin, that tum a tha thei lo kha a lo dam a, fel tum fel thei lo leh thianghlim thei lova chu thianghlima kan inlan theihnan Pathian chuan a fapa Isua Krista nun chu kan nunna atan, kan thianghlimna atan min puan chhuahsak tawh zawk a ni. Fel tumna, that tumna kha awm tawh lovin. Tihdamna ni lo, Tidamtua zawk kha kan nunah Pathianin a lo puang reng zawk a ni. Hei lo hi kan tan Piantharna a awm lova, hei lo hi kan tan damna a awm lo.

Chu Pathian thil thlawn pek chu miin a lo chan tawh chuan amahah Krista Rilru a lo awm a, Inkhawm te, tawngtai te, Bible chhiar te, KTP activities-a tel te kha mihring mize tha lam a tum ngat ngat ngai tawh lovin, amaha Krista rilru awm a khan nuam takin a lo tih tir ta zawk a, Tum luih leh tih luih vak ngai lovin Krista, atana a inpekna thuk tak hre chungin rawng a bawl ta zawk thin a ni. He Pathian thil thlawnpek hi kan hriat chian chiah hunah Thlarau thinghlim neiin rawng kan bawl thei dawn a lo ni. Kan thiltih engah pawh a malsawmna dawngin kan lo awm tawh ang. Chu nunah chuan a lawm tling lo tak leh chak lo chung chung pawha khap chen lek kan thawh ve te Pathian malsawmtu chuan hlam chen chen a mal min sawm sak thin ni.

Pathian thil thlawn pek man chiang a hre chiang a piang chuan anmahni inveina ramah an lut thin. Rawngbawlna a an thawh nasat poh leh Krista’n a tana a thawhsakna a en a, a mah zawk a tling lo leh thin. Pathian thu hria a intihna te, hruaitu tha leh zei a intihna zawng zawng te, tling, fel, tha a intihna zawng zawng te, Kohhran hruaituten rin rawl berah an nei nia a in hriatna zawng zawng te chu Krista’ah a han in hmu chiang a, engmah lo mai a ni tih a inhre chhuak leh thin. Krista nen a han inbuk a, a mah, mihring zawk a kha a lo kang leh thin zawk a ni. Lungngaihna leh natna te, hrehawmna ten a chim buai phak tawh lo. Inkhawm rei avang te, hla nawn rei avang te, hla zir rei avang mai mai te a ning hmel an pu tawh lova, tawngtai tlaivar an hlau tawh lova, Lal Isuan a tuar sakna kha an rilruah a lo lang a, an tawrh nep zia an hre chhuak zawk thin. Dikna puan chhuahna tur a nih phawt chuan hruaitute rilrem zawng an ngaihtuah tawh lo. Sawisel an hlau tawh lova, an tih chhan leh rawng an bawl chhanah an chiang tawh zawk a ni.  Tirhkoh Paula’n ‘Neksawrin kan awm a, vuakin kan awm a, tih duhdahin kan awm a, mahse kan na si lo’ a tih nunah khan Lalpa’n a hung tlat tawh thin a ni.

Chu Pathian thil thlawnpek chu chang a; ringtu nun diktak kan neih theih nan Lalpa’n kan thusawi te mal min sawmsak rawh se. Amen.


  

Lalpa thuin lèn i deng ang u!

Lalpa thuin lèn i deng ang u!
Chàng thlan: Luka 5:4-7, Johana 21:4-8

by Denis Lalfela, Rome

Tholeh Krista zara sual hnehna nun changtu ten kraws en chunga ke an pen a tul ta! Isua zirtirte leh amah zuitute te pawh khan beidawnna ruam an dai ve tlat. Kan tan inhnemna leh huaisenna thlentu ni mawlh rawh se. Simon Petera nunram hi ngun takin i thlir teh ang. Eizawnna kawngah chhungkaw chàwm thei khawp a lèn den thiam, sangha mantu a ni (Mt 4:18). Chuti taka thiam si, zan khat chu len dengin a fehchhuak a, engmah a man tlat lo. Zing khawvarah tholeh Isuan len deng leh turin a ti tlat. Mihring chapona atang chuan a har ngawt ang chu! “Lalpa, zankhuain engmah kan man lova, mahse i thuin ka dèng leh ange” tiin a thawk chhuak leh a. Sangha tam tak a a man leh ta mai. Lalpa thu nghak lova ropuina um a lèn kan den avangin beidawnna leh chhungril khawharna kan tawk fo. Inhnemna zawngin humsual kan la dai zui. Nun tam nei turin Lal Isuan min sawm tak meuh a ni. Lalpa thua lèn kan den hunah engkimah a ropuina leh khawngaihna thukzia kan hmu ang.

Thlarau a rawngbawltu ten Petera experience hi nitin an nung tur a ni. Thusawi tha tak pawh hi tinungtu thlarau a tel loh chuan thu ve mai, tumah chawm lova thàmral mai tur a ni. Tirhkoh Paula chuan, “Pathianin khawvèl thil àte chu a thlang zawk a, mifingte chu a tihmualpho theihna tùrin; tin, Pathianin khawvèl thil chaklote chu a thlang a, thil chakte chu a tihmualpho theihna turin” (1 Kor 1:27) a lo ti daih mai. Ringtute hnenah Pathian thu kan sawi hmain ringtute chu Pathian hnenah kan hlan hmasa tur a ni. Lalpa thua lèn kan den chuan ringtu ten kan nunah Krista an hmu ang a, kan thusawi pawhin an thlarau nun a chàwm ngei ang. Lalna leh hmingthanna ùm a rawngbawltute chu sawi tam ngai lovin a ni tèlin an beram ten an hlat tial tial ang. Inkhawm kan tlem zel nachhan hi thatchhiatna piahlamah, berampute thusawi leh nunram inpersan lutuk vang a ni ngei ang.

Missionary ten mihring ram paih thlain Lalpa thuin lèn an deng ngam tur a ni. A kotu chu Pathian a ni a; chunglam dah lal si lova pen chhuak ve mai an nih hlauh chuan an va kalna ram/ hmunah phurrit an nih bakah Chanchin Tha an puang kher lovang. Tin, nu leh pa ten fate an enkawlnaah Petera thinlung puin, “Lalpa i thuin kan fate hi kan enkawl ange, min pui rawh” ti a Lalpa an belh a tul lehzual ta! Beidawn chang awm mahse, Lalpa nena fate enkawltu chuan zawi zawiin Pathian hnathawh a hmu ang. Ram hruaitute phei chuan mathei lovin Lalpa thuin lèn an deng tur a ni. Thlarau puihna nena rorel kan zir hunah Zoramah ngei pawh dikna a lal anga, ei leh bar a hmasawn kan sawn rualin kan thlarau nun pawh a thang zel ang. Hawh u, Lalpa thuin lèn i deng theuh ang u. Peteran vawi thum a Lalpa a phatsan a, vawi engzatnge i phatsan ve le? Kum thum lai lo kaihhruai tawh, a beramte chawm zel tura a lo bèlruat Petera chuan a phatsan daih mai. Phatsanna sual a dai hnua Petera rilru siam dan hi a entawn tlak leh hle thung. Tih tak zeta inchhirin, a tap hawm hawm a. A beramte chawm turin Isuan a nemnghet zui ta.

Peteran vawi thum a phatsan vang em ni dawn ni, Isua khan “Peter, min hmangaih em?” tih vawi thum a zawt ve kher nia. Setanan min sawp fo mahse, Kristaah hnehna leh nunthar kan nei thei tih hi chiang ila. Tidamthei hmangaihna chu pawmtu leh ataka temtu kan ni tur a ni. Kan sualna aiin Pathian hmangaihna a thuk zawk a. Halral thilhlan aia zahngaihna duh zawktu kan Pathian hian thinlung taka inchhirte ngaidamin nunthar a pe thin. I ngaihtuah tawh ngai emaw, hringfate zalenna min pekna hi kan Pathian ropuina a ni. Tihluihnaa amah kan thlan a duh lova, zalenna famkim nena amah thlangte hi a lawm a, a kaihruaiin a tithianghlim thin.

Petera kha engvangin nge Kristan a rin em em le? Petera chuan a chaklohna bak chhuan tur a neih lohzia a pawm a. Engkimah Lalpa auh nachang a hriat avang tak chuan beramte chawm tura a thlan a ni. Petera rawngbawlna kha thlarau hna a nih avangin Kristaah a hausa tlat. Kan rawngbawltute hi Kristaah an hausa ve em? Krista mi hriat, tawngtai mi leh mahni beramte ngaihsak mi nise heti khawp hian kan sawisel phal lovang a, an sermon ngaihthlak chakin Biakin hla takah pawh kan tlan dawr dawr ta ve ang. Chutin thawhlawm thawh kan chak hliah hliah ang a, mahni phàk tàwk pe te pawh an làwm veng veng tawh ang. Chutah zet zawng Kohhran tinah thlarau mi an lal ang a; mitin an hausakna leh nihna in kan teh tawh lovang a, thlarau hnathawh leh thlarau nun dik tak kan hrethiam ve tawh ang. He hun lawmawm a lo thlen theih nan kohhran tinte nasa lehzualin kan tawngtai tur a ni. Mi nuna fello kha kan nunah a inphum ve reng tih hria a tan lak a hlawk ber! Rawngbawltu tlinlohna avangin Pathian ka rinna a nep tur a ni lo. Kohhran chu kan ta theuh a ni a, a dintu Krista chu kan hruaitu a ni. Eng dinhmunah pawh Lalpan min dah se taima leh thahnemngai taka thawh hi ringtu puitling awmdan a ni.

Isua lam pana tuichunga Petera a kal khan, a Lalpa a en chhung chu a kal a, a rin ngam chhung chu a pil hauh lo. Mahse tuipui, hlauhawmna leh thlemna chu a hmuh veleh pil dawn niin a inhria a, Lalpa a au ta ruai mai. Petera thil tawn hi nitin atakin kan nunah kan hmu. Lalpa ring a ke kan pén chhung chuan kan hlau lova, thlemna lian tak pawh kan hneh mai thin. Kan dam chhungin tuarna, manganna leh tahna kan tawk fo. Lal Isuan “Tin, kei, lei ata khaikànin ka awm chuan, mi zawng zawng keima hnenah ka hìp ang” (Johana 12:32) a tih ang hian, Krista kraws-ah chauh kan tuarnain awmzia a nei anga, harsatna kara retheite leh thlarau bo te tana kan inpekna pawh hian kraws ah chakna thar a thàl zel ang. Petera nun harsa tak her rem zeltu Isua hian amah kan thlan tlat chuan min veng zel ang. Aman tlinga min puan avang zawkin kan awmna hmun theuhah a sipai huaisen kan ni ang. Chutah zet chuan pawl ram kan thiat ang a, mitin thinlungah Pathian a lalber tawh ang! Kan tana tholeh Krista chuan malsawm che rawh se.


  

NIHNA HRIAT

NIHNA HRIAT
( Ephesi 2: 8-10, I Timothea 1 : 15 )

- Selthanga

I Tim 1:15 –     ‘Krista misualte chhandam turin khawvelah hian a lo kal’ tih hi a rinawmin a pawm tlak em em a ni; an zinga misual ber ka nih hi.
Eph. 2:8-10-    ‘Rinna avanga khawngaihna a chhandam in ni; nagmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ange. Thil tha ti atan Krista Isua ah chuan siam a awmin a ma kut chhuak kan nisi a; chu thil tha tih chu kan awmna turin Pathianin a buatsaih lawk a ni’.

Unau te u, he lai Bible chang ka han tarlanah hi chuan Krista ring tute kan nihna an sawite hi a duhawmin ava thlamuan thlak em.

Krista Isua, keini misualte min chhandam tura khawvela alo kal duh ringawt leh chumi kan lo rina khawngaihna a chhandam han nih rik ngawt mai chu ava han ropui em. Amaherawh chu thil tha ti atan Krista Isua ah siamin, ama kut chhuak kan nih erawh kan thei nghilh loh a kan hriat reng chu kan mawhphurh, kan bat pawh ti ila a sual awm lo ve.

Chuvangin kan awmna tur Pathianin a buatsaih lawk a ni, hetiang a phu loh khawngaih malsawm dawngtu te hian, kan nihna ‘inni e’ min tihna hi kan hriat a pawimawh tak zet zet a ni. Entirnan, Laiking pawh hi alo pian chhuah chuan ‘enge ka ni’ tih a hre lo a, kalkawng sir ah a lo vak tiat tiat mai a, mi kal velin ‘a Laiking a ni’ an han ti a. “A! Laiking ka lo nih chu” tiin Laiking nihna angin a awm ta a ni anti.

    Keini mihring pawh hi kan lo piang chhuak a, naupang chu sawi loh puitling pawh Pathian thuin, ‘Rin a vanga khawngaihna a chhandam in ni’ min tih hi mi in min hrilh hma chuan Laiking angin tuman kan nihna kan hre lova, mahse tunah hi chuan ringtu reng rengte chuan rin a vanga khawngaihna a chhandam kan ni kan tih vek hmel e, chutiang kan nih si chuan hawh u kan nihna ah hian ding ngamin i awm ang u. Chutichuan inrel, insawisel, innghirngho neuh neuh a reh anga, corruption, ruih hlo a bo anga, ‘inhmangaih tawnna mai lo chu tuma engmah ba suh u’ tih hmun ah kan cheng ang a, Zoram hi Kristian ram a nih angin siamtharin a lo awm dawn nia.

Aw Zoram, Zoram, Pathian thuin i nihna a tih hi in belin ding chhuak rawh, ding ngam rawh, tichuan Pathian thlamuanna rilru reng reng a hriat sen loh khan in thinlung leh in ngaihtuahnate chu Krista Isua ah chuan a ven sak ang che u, Phil 4:7. Aw, ava nuam dawn em, ava hlimawm dawn em, hlimtawp hlau lova Pathian nen a lendunna hmun alo ni dawn a ni.

Lalpan a thu te malsawm rawh se.


  

NISI, NISI LO

NISI, NISI LO ( Mathaia 27:42 )

- RK Daniela

Midang mah a tidam thin a, mahni a inti dam thei thei si lo. Israel lal a ni alawm, tunah hian Kross ata chu lo chhuk ang hmiang, tichuan amah chu kan ring ang.

He chang tawite hian thu ril tak leh pawimawh em em chatuan nun hawlhtlang a pai tlat mai. Lal Isua chuan Palestina ram dung leh vang fang chhuakin dam lo tinreng a ti dam a,mitthi tawh thlan a ni li lai inphum tawh uih tawh ngei tur a rin pawh a kai tho thei a. Rapthlak taka amah hmusit taka, amah khengbet tute hi chawp leh chilh tak pawhin a ti hlum vek thei ngei ang. Mahse, hei hi nisi nisi lo kan thupui a kan vuak chu a ni ta a ni.

Mihring lam ngaihdan leh hriat dan chuan engkim ti thei chuan a tih theih ngei a rinawm tlat si. A riltam lai takin ”Heng lung hi chhang(chaw) a chantir turin thu pe rawh” (Mathaia 4:3)nen hian a inzawm riau mai. Lal Isua chu Pathian a ni a, khawvelah mihring anga lo piangin a khawsa a, a lo kal chhan ber tlanna (chhandamna) hna chu Pa duhzawng a thawkzo tur chuan a thiltih duh zawng leh mihring thiltih duh zawng chu a inkalh tlat si a ni. A tih theih em em tur leh a tih duh ngei tur anga mihring (setana) in angaih chu a ti duh lo (a ti lo thei) tlat, a lo kal chhan tihlawhchham thei thil reng reng engmah a ti lo thei tlat. He thu ril tak chatuan nun hawlhtlang Krista thu awihna avang chauh hian nang leh kei hian chatuan nunna kan chan phah ta a ni.

Lal Isua chu mihring duhdan, hmuh dan, hriat ve dan, ngaih ve dan lam tel miah lovin Krossah a tuar a, Kross thu chu boral mekte tan chuan atna a ni a, keini chhandam mek te tan chuan Pathian thiltihtheihna a ni si a.

Tin, hnathawktu hlawh chu khawngaihna a ruat a ni lo va bat a ruat a ni zawk e (Rom 4:4).

Khawngaihna chu nisi nisi lo ata lo chhuak chu a ni, chu chu Kross thuruk chu a ni. Hnathawk lo, Pathian pawh ngaihsak lo, thiam chantirtu ring zawk a rinna chu, ama felna a ruat a ni. Mi a thiltih ngaihtuah lova Pathianin fela a ruat a chu a eng a thawl e a ti mai zawk a ni.

Lal Isua, Pathian lei leh van leh thil engkim siamtu-in Kraws a hnehna a channa kha thuawihna (khawngaihna) liau liau a ni. Thil engkim ti thei a kha engmah ti thei lo ang mai a, a chan takna tak mai kha a ropui leh thukna lai ber mai chu a ni, Nang leh kei misual ber Eden huana thi tawh a min puanna, Lal Isua thi a phum a nih tak mai kha phuma ka awmna- Krista thu anih tluantlinga thi a, tho leh taah khan SIAMTHARA AWMA KA THAWH LEHNA chu a lo ni ta a, ka tih ve awm miah lova, na tuar miah lovin Eden natna ka lo vei thin, Kristaa zai (operation) dam ka lo ni ta mai hi a ropui em em mai a. “Nisi Nisi lo” tih hian a la hrilhfiah zo lo mah mah niin ka hre thin.

Ka thiltihtheihna hi chak lohna-ah asin tih famkimin a awm ni (II Kor. 12:9) Pathian thiltihtheihna chu chaklohna (thiltihtheihlohna) Kraws-ah tihfamkimin a lo awm ta. Tholeh Krista chuan khawvel ka ngam ta ! a lo ti thei ta zawk a ni. Thiltihtheihna lang lama kan thlir mek laiin chan loh khan lamah a lo chhuak leh mai thin hi Kraws thu hi zawng a rilin a thuk em mai a, mihring hmuh ngailoh a nih avangin boral mekte tan chuan , “Nisi, Nisi lo” hi atna a tling tlat reng a ni.

A va ropui em ! Lalpa chu fakin awm rawh se. Hriatna, hmuh theihna thlarau thianghlim min tifing tu avang chauhin kan lo chang thei ta a ni e.

Chhandamtu chuan chatuanin ropuina chang rawh se. Amen.